ທະຫານລາວ ຍິງປະທະ ກຸ່ມຕໍ່ຕ້ານ ຕາຍນຶ່ງ

ເກີດເຫດຍິງປະທະກັນ ຢູ່ເມືອງທ່າໂທມ ແຂວງໄຊສົມບູນ ລະຫວ່າງ ກໍາລັງທະຫານ ຂອງກອງທັບລາວ ກັບກຸ່ມຕໍ່ຕ້ານຣັຖບານ ໃນວັນທີ 9 ມີນາ ທີ່ຜ່ານມາ, ເປັນເຫດເຮັດໃຫ້ກຸ່ມຕໍ່ ຕ້ານຣັຖບານ ເສັຽຊີວິດນຶ່ງຄົນ, ອີງຕາມແຫຼ່ງຂ່າວຈາກ 3 ຄົນ ທີ່ໃກ້ຊິດກັບ ເຈົ້າໜ້າທີ່ທະຫານ.

ບຸກຄົນທີ່ໃກ້ຊິດທະຫານ ຜູ້ທີ່ປະຕິບັດໜ້າທີ່ຢູ່ ແຂວງໄຊສົມບູນ ຜູ້ທີ່ບໍ່ປະສົງອອກຊື່ ແລະສຽງ ໄດ້ກ່າວຕໍ່ເອເຊັຽເສຣີ ໃນວັນທີ 16 ມິນາ ວ່າ:

ໃນໄລຍະນີ້ ເຈົ້າໜ້າທີ່ບໍ່ອະນຸຍາດໃຫ້ ປະຊາຊົນເຂົ້າໄປໃນເຂດ ທີ່ມີການຍິງກັນ.

ທ່ານກ່າວຕື່ມວ່າ ກຸ່ມຕໍ່ຕ້ານຣັຖບານ ຈຳນວນນຶ່ງຫຼົບໜີ ແລະ ທາງການມີການສົ່ງໜ່ວຍກຳລັງທະຫານ ໄປປະຈຳຢູ່ເຂດທີ່ມີການ ປະທະກັນ ຊຶ່ງເປັນພື້ນທີ່ພູສູງ. ບຸກຄົນທີ່ໃກ້ຊິດ ເຈົ້າໜ້າທີ່ທະຫານ ລະດັບສູງອີກທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 16 ມິນາ ວ່າ:

ຫຼັງຈາກມີການປະທະກັນ ທາງການ ແຂວງໄຊສົມບູນ ໄດ້ສົ່ງເຈົ້າໜ້າທີ່ທະຫານໄປສົມທົບ ກັບ ທະຫານເມືອງທ່າໂທມ ເພື່ອປິດລ້ອມ ຝ່າຍຕໍ່ຕ້ານ.

ນອກຈາກນີ້ ອະດີດເຈົ້າໜ້າທີ່ທະຫານ ທ່ານນຶ່ງໄດ້ກ່າວຕໍ່ເອເຊັຽເສຣີວ່າ:

ເກີດມີການຍິງປະທະກັນ ຢູ່ໃນເຂດດັ່ງກ່າວແທ້ ແລະ ມີຝ່າຍຕໍ່ຕ້ານເສັຽຊີວິດຄົນນຶ່ງ.

ກ່ຽວກັບເລື່ອງນີ້ ປະຊາຊົນຢູ່ ໃກ້ຈຸດເກີດເຫດ ຢູ່ເມືອງທ່າໂທມ ໄດ້ກ່າວວ່າ:

ເຂົາຍາມຕາມທາງຫຼາຍ ມີແຕ່ທໍ່ລະທະຫານກະມາຫຼາຍ ເຂົາກະສະກັດກັ້ນມັນ ຍັງມີລູກນ້ອງ ມັນຊິເອົາກຳລັງມັນມາເອົາຄົນນີ້ໄປ ເຂົາບໍ່ຖິ້ມກັນເດ້ ແຕ່ວ່າ ທະຫານເຮົານີ້ ຢຶດແລ້ວ ທະຫານເຮົາມາແຕ່ ໄຊສົມບູນ ຫຼາຍແທ້ຫຼາຍວ່າ ຢູ່ຫົວບ້ານນີ້ນ່າ.

ຫ້ອງວ່າການເມືອງທ່າໂທມ ແຂວງໄຊສົມບູນ ໄດ້ອອກແຈ້ງການ ໃນວັນທີ 15 ມິນາ ທີ່ຜ່ານມາ ເພື່ອຫ້າມບໍ່ໃຫ້ ປະຊາຊົນເຂົ້າໄປ ຫາກິນ ແລະ ທຳການຜລິດຢູ່ຈຸດຫວ່າງຄານ, ຫຼັງຜາຕຸງ ຈົນເຖິງບໍຣິເວນ ທົ່ງຫ້ວຍຫົກ, ທົ່ງລ່າງ ທົ່ງຂີ້ມົດ ຈົນຮອດ ເຂດສົບແຈ.

ແຈ້ງການໄດ້ຂຽນ: ຫ້ອງການເມືອງທ່າໂທມ ແຂວງໄຊສົມບູນ ຂໍແຈ້ງການມາຍັງ ບັນດາໜ່ວຍງານ, ຫົວໜ້າຫ້ອງການ, ຫົວໜ້າ ໜ່ວຍບໍຣິການ, ຣັຖວິສາຫະກິດ, ອົງການປົກຄອງ ບ້ານ 26 ບ້ານ ເມືອງທ່າໂທມ ຮັບຊາບວ່າ ຫ້າມບຸກຄົນໃດ ຫຼື ປະຊາຊົນເຂົ້າ ໄປຊອກຢູ່ຫາກິນ ຫຼື ເຂົ້າໄປທຳການຜລິດ ຢູ່ໃນເຂດຈຸດຫວ່າງຄານ ຫຼັງຜາຕຸງ ຈົນເຖິງບໍຣິເວນ ທົ່ງຫ້ວຍຫົກ, ທົ່ງລ່າງ, ທົ່ງຂີ້ມົດ ຈົນຮອດ ສົບແຈ ບໍ່ວ່າ ກໍຣະນີໃດກໍຕາມ ນັບແຕ່ມື້ໄດ້ຮັບແຈ້ງການ ຈົນເຖິງວັນທີ 30 ມິນາ 2021.

ແຈ້ງການຍັງຂຽນຕື່ມວ່າ: ເນື່ອງຈາກວ່າ ທາງກອງບັນຊາການທະຫານ ແຂວງໄຊສົມບູນ ແລະ ກອງບັນຊາການທະຫານເມືອງ ທ່າໂທມ ຈະມີແຜນເຄື່ອນໄຫວ ລາດຕະເວນ ແລະ ຊ້ອມຣົບ ຢູ່ໃນເຂດບໍຣິເວນ ດັ່ງກ່າວ ສະນັ້ນ ຈຶ່ງຂໍແຈ້ງໃຫ້ບັນດາ ທ່ານ ຫົວໜ້າຫ້ອງການ, ໜ່ວຍບໍຣິການ, ຣັຖວິສາຫະກິດ ແລະ ອົງການປົກຄອງບ້ານ 26 ບ້ານ ແຈ້ງໃຫ້ ພະນັກງານ ຂອງຕົນ ແລະ ປະຊາຊົນຂອງຕົນ ໃຫ້ຮັບຊາບ ແລະ ຂໍຄວາມຮ່ວມມື ເປັນເຈົ້າການ ໃນການຈັດຕັ້ງປະຕິບັດແທ້ໆ, ຖ້າຫາກກໍຣະນີ ມີຜູ້ຜ່າຜືນ ເຂົ້າໄປໃນເຂດດັ່ງກ່າວ ມີຫຍັງເກີດຂຶ້ນ ທາງການຈັດຕັ້ງເມືອງ ຈະບໍ່ຮັບຜິດຊອບໃດໆທັງສິ້ນ.

ເຖິງວ່າ ຫ້ອງການເມືອງທ່າໂທມ ຈະບໍ່ແຈ້ງການລະອຽດກ່ຽວກັບ ການປະທະການ ກັບ ກຸ່ມຕໍ່ຕ້ານຣັຖບານ, ແຕ່ປະຊາຊົນໃນເຂດ ດັ່ງກ່າວ ກໍຮູ້ດີວ່າ ມີເຫດການຍິງ ປະທະກັນແທ້.

ເອເຊັຽເສຣີ ຕິດຕິດຕໍ່ຫາ ທ່ານ ພຸດທະສາດ ນ້ອຍທະວີ ຫົວໜ້າຫ້ອງການເມືອງທ່າໂທມ ກ່ຽວກັບການຍິງ ປະທະກັນ, ແຕ່ ທ່ານ ກໍຕອບວ່າ:

ບໍ່ສາມາດໃຫ້ລາຍລະອຽດເລື່ອງນີ້ໄດ້ ແລະ ຕອນນີ້ ຄາປະຊຸມຢູ່.

ນອກຈາກນີ້, ເຈົ້າໜ້າທີ່ຫ້ອງການຖະແຫຼງຂ່າວ ວັທນະທັມ ແລະ ທ່ອງທ່ຽວ ເມືອງທ່າໂທມ ໄດ້ກ່າວວ່າ ບໍ່ຮູ້ເລື່ອງນີ້:

ພວກເຮົາຍັງບໍ່ທັນ ໄດ້ຮັບຮູ້ເນາະເຈົ້າ ບາງເທື່ອເຂົາເວົ້າຊື່ເບາະ ບໍ່ໄດ້ຍິນຫຍັງນະເຈົ້າ.

ເຫດການຄວາມບໍ່ສງົບ ຢູ່ແຂວງໄຊສົມບູນ ທີ່ຜ່ານມາ ເກີດຂຶ້ນຫຼາຍຄັ້ງ ຊຶ່ງເປັນການຍິງປະທະກັນ ລະຫວ່າງ ທະຫານທາງການ ລາວ ແລະ ກຸ່ມຕໍ່ຕ້ານຣັຖບານ ໃນທ້າຍປີ 2015-2016, ເປັນເຫດເຮັດໃຫ້ມີເຈົ້າໜ້າທີ່ ທະຫານ ແລະ ປະຊາຊົນເສັຽຊີວິດຫຼາຍຄົນ.

ໃນປີ 2019 ທີ່ຜ່ານມາ, ສຳນັກຂ່າວ Ajazeera ໄດ້ລາຍງານວ່າ ຍັງມີກຸ່ມເຜົ່າມົ້ງ ທີ່ຕໍ່ຕ້ານທາງການລາວ ທີ່ຢູ່ພາກເໜືອຂອງລາວ.

https://www.rfa.org/lao/daily/politics/soldiers-and-anti-government-force-clash-killing-one-xaysomboun-province-03172021202412.html