ວິທີ ນັກລົງທຶນ ຍຶດເອົາທີ່ດິນ

ນັກລົງທຶນຕ່າງປະເທດເຂົ້າມາເອົາທີ່ດິນ ຂອງປະຊາຊົນປູກຢາງປາຣາ ດ້ວຍການບຸກເບີກ ເອົາທີ່ດິນ ປະຊາຊົນກ່ອນ ແລ້ວຈຶ່ງຂໍ ອະນຸຍາດ ຕາມພາຍຫລັງ, ດ້ວຍການໃຊ້ອຳນາດ ແລະ ດ້ວຍການຕົວະຍົວະ ປະຊາຊົນ. ດັ່ງປະຊາຊົນ ຢູ່ແຂວງພາກໃຕ້ ທ່ານນຶ່ງໄດ້ກ່າວ ຕໍ່ ເອເຊັຍ ເສຣີ ໃນວັນທີ 21 ພຶສຈິກາ ຜ່ານມາວ່າ:

“ເຂົາຈະໃຊ້ວິທີບຸກເບີກກ່ອນແລ້ວ ຈຶ່ງໄປຂໍນຳພໍ່ແມ່ປະຊາຊົນຕາມຫຼັງ, ອັນທີສອງມາແມ່ນ ເຂົາຈະໃຊ້ອຳນາດຜູ້ທີ່ມີ ບາລະມີ ຫຼືຜູ້ທີ່ມີ ອຳນາດ ໃນຂົງເຂດນັ້ນ, ອັນທີ 3 ມາແມ່ນການຕົວະຍົວະ ຕົວະຍົວະແນວໃດ ເຂົາຈະເວົ້າວ່າ ໝາຍເຖິງວ່າ ເຂົາເຈົ້າໄດ້ບອກໄວ້ວ່າ ຖ້າວ່າໃຫ້ ສຳປະທານ ເງິນຈະໄຫລເຂົ້າເຮືອນ ທຸກມື້ ທຸກວັນ ບໍ່ຢຸດ”.

ປະຊາຊົນທ່ານນີ້ກ່າວອີກວ່າ;

ວິທີການທີນຶ່ງ: ນັກລົງທຶນຕ້ອງການທີ່ດິນ ບ່ອນໃດ ເຂົາຈະສັ່ງໃຫ້ມີ ການບຸກເບີກເລີຍ ໂດຍທີ່ບໍ່ຂໍອະນຸຍາດ ນຳພໍ່ແມ່ປະຊາຊົນ.

ວິທີການທີສອງ: ເຂົາເຈົ້າຈະເຂົ້າຫາ ແລະ ໃຫ້ສິນບົນເຈົ້າໜ້າທີ່ທ້ອງຖິ່ນ ນັບແຕ່ນາຍບ້ານ ໄປເຖິງລະດັບເຈົ້າແຂວງ ເພື່ອໃຊ້ອຳນາດ ບັງຄັບໃຫ້ປະຊາຊົນ ມອບດິນໃຫ້ ບໍຣິສັດ.

ແລະ ວິທີການທີສາມ: ການລົງມາລະດົມປະຊາຊົນ ໂດຍອ້າງເຫດຜົນວ່າ ຈະຫລຸດພົ້ນອອກຈາກ ຄວາມທຸກຍາກ ຫລື ຮັງມີດີງາມ ຖ້າວ່າ ໃຫ້ການຮ່ວມມື ກັບບໍໍຣິສັດ.

ປະຊາຊົນໄດ້ຮັບຄວາມອັບປະໂຫຍດ ສະນັ້ນເຂົາເຈົ້າ ຕ້ອງການຢາກໃຫ້ຣັຖບານ ເຂົ້າມາແກ້ໄຂ, ດັ່ງປະຊາຊົນ ທ່ານນີ້ກ່າວຕື່ມອີກວ່າ:

“ໃນຄວາມຄິດກໍຄືວ່າ ມັນບໍ່ຊອບທັມ ມັນບໍ່ຍຸຕິທັມ ແກ່ປະຊາຊົນ ທີ່ຢູ່ຂົງເຂດນັ້ນ ຂົງເຂດດັ່ງກ່າວນັ້ນ ຈຶ່ງເຮັດຄຣິບນີ້ມາ ທວງຄວາມ ຍຸຕິທັມ ແລະເອີ້ນຄວາມສົນໃຈ ໃຫ້ພັກຣັຖເຂົ້າມາ ເຂົ້າມາເບິ່ງ ເຂົ້າມາຊ່ວຍ ເຂົ້າມາແກ້ໄຂ.”

ກ່ຽວກັບເລື້ອງນີ້ ຣັຖບານກໍອອກມາຍອມຮັບວ່າ ການໃຫ້ ສຳປະທານ ທີ່ດິນ ແມ່ນສ້າງຄວາມອັບປະໂຫຍດ ໃຫ້ແກ່ປະຊາຊົນ. ດັ່ງ ທ່ານ ທອງລຸນ ສີສຸລິດ ນາຍົກຣັຖມົນຕຼີ ໄດ້ກ່າວ ຢູ່ໃນກອງປະຊຸມ ສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ 8 ໃນວັນທີ 23 ຕຸລາ ຕອນນຶ່ງ ວ່າ:

“ການປະຕິບັດກົດໝາຍ ນິຕິກັມກ່ຽວກັບ ທີ່ດິນມີຊ່ອງຫວ່າງຫລາຍ ພາໃຫ້ການສວຍໃຊ້ສວຍໂອກາດ ເອົາລະບຽບການຕ່າງໆ ມາປັບປ່ຽນ ແອບແຝງ ໃຫ້ເປັນປໂຍດຂອງບຸກຄົນ, ກຸ່ມຄົນ ຫລືວ່ານັກ ທຸຣະກິດ ຈໍານວນນຶ່ງ ເທົ່ານັ້ນ ໄດ້ຮັບຜົນປໂຍດ ແຕ່ວ່າ ກຸ່ມຄົນ ຈໍານວນນຶ່ງ ບຸກຄົນປະຊາຊົນ ຊໍ້າພັດເສັຍຜົນປະໂຫຍດ ຫລືວ່າ ອັບປະໂຫຍດ.”

ການປູກຢາງພາຣາ ແມ່ນມີຂຶ້ນທຳອິດໃນປີ 1994 ຢູ່ແຂວງຫຼວງນ້ຳທາພາກເໜືອ ຂອງປະເທດລາວ ກ່ອນທີ່ຈະຂະຫຍາຍໄປແຂວງອື່ນໆ. ອີງຕາມຂໍ້ມູນ ຈາກກະຊວງຊັພຍາກອນ ທຳມະຊາດ ແລະ ສິ່ງແວດລ້ອມ, ຣັຖບານໄດ້ໃຫ້ ສຳປະທານທີ່ດິນ ແກ່ນັກລົງທຶນ ຕ່າງປະເທດ ປູກຢາງພາຣາປະມານ 3 ແສນ ເຮັກຕາ.

ການໃຫ້ສຳປະທານແກ່ນັກລົງທຶນ ໃນການປູກຢາງພາຣາ ເຮັດໃຫ້ເກີດຂໍ້ຂັດແຍ່ງ ກັບປະຊາຊົນ ທີ່ເປັນເຈົ້າຂອງທີ່ດິນ ຈົນເຮັດໃຫ້ ຣັຖບານ ໄດ້ມີຄຳສັ່ງເລກທີ 13 ໃນເດືອນມິຖຸນາ ປີ 2012 ເພື່ອສັ່ງໂຈະ ການໃຫ້ສຳປະທານທີ່ດິນ ປູກຢາງພາຣາ ແລະ ການປູກຕົ້ນວິກ ໃນທົ່ວ ປະເທດ.

http://www.rfa.org/lao/daily/economy/laos-investors-grabbed-peoples-land-in-many-ways-11222017065444.html

ອອກຄຳເຫັນຜ່ານເຟຊບຸກ

admin

Webmaster