ໄມ້ເຖື່ອນໃກ້ເຂດຊາຍແດນ ລາວ ວຽດນາມ

ໃນມື້ວັນທີ 13 ທັນວາ ປີ 2017 ຄນະກວດກາ ແລະປາບປາມ ປະກົດການຫຍໍ້ທໍ້ທາງສັງຄົມ ແຂວງອັດຕະປື ໄດ້ກວດພົບເຫັນໄມ້ທ່ອນ ທີ່ຜິດກົດຫມາຍ ຈຳນວນ 250 ຕັບ ຫລື ປະມານ 180 ແມັດກ້ອນ ຊຸກເຊື່ອງໄວ້ ໃນບໍຣິເວນຊາຍແດນ ລາວ-ວຽດນາມ ຫລັກຫມາຍທີ 770 ແລະ 776 ດ້ວຍການຝັງໄມ້ ດັ່ງກ່າວໄວ້ໃນດິນ, ຊຶ່ງໃນເວລານີ້ ເຈົ້າຫນ້າທີ່ກ່ຽວຂ້ອງ ກຳລັງສືບສວນຫາເຈົ້າຂອງໄມ້ນັ້ນຢູ່ ຄາດວ່າ ເປັນໄມ້ ທີ່ຊຸກເຊື່ອງໄວ້ດົນແລ້ວ ເພື່ອລໍຖ້າການເຄື່ອນຍ້າຍ ອອກໄປ ວຽດນາມ. ດັ່ງເຈົ້າຫນ້າທີ່ອາວຸໂສ ແຂວງອັດຕະປື ທ່ານນຶ່ງກ່າວ ໃນມື້ວັນທີ 18 ທັນວາ ນີ້ວ່າ:

“ເປັນການກວດກາ ຂອງຄະນະກວດກາ ຂອງແຂວງ ທີ່ໄປພົບເຫັນການຊຸກເຊື່ອງໄມ້ ທີ່ນັ້ນຫັ້ນນະ ໂຕນີ້ກະຍັງບໍ່ຮູ້ແມ່ນໃຜ ກະຊີ່ແມ່ ນັກທຸຣະກິດລາວ ກັບວຽດນາມ ຫັ້ນແຫລະຮ່ວມກັນ ກະເຂົາບໍ່ທັນໄດ້ເອົາເມືອ ພວກເຮົາໄດ້ໄປເຫັນກ່ອນ ຖືວ່າໄດ້ກວດໄດ້ກາ ໄດ້ເບິ່ງ ຫມົດແລ້ວນະ.”

ທ່ານກ່າວຕື່ມວ່າ ຄະນະກວດກາເຊື່ອວ່າ ໄມ້ທີ່ຊຸກເຊື່ອງໄວ້ ໃນບໍຣິເວນນັ້ນ ອາດມີຫລາຍກວ່ານີ້ ຊຶ່ງໃນເວລານີ້ ເຈົ້າຫນ້າທີ່ກຳລັງຄົ້ນຫາ ແລະໃນຂນະດຽວກັນເຈົ້າຫນ້າທີ່ ອີກຊຸດນຶ່ງກໍໄດ້ພົບເຫັນ ຈັກເລື່ອຍໄມ້ສອງເຄື່ອງ ໂຕະຊອຍໄມ້ນຶ່ງເຄື່ອງ ແລະ ໄມ້ທ່ອນອີກຈຳນວນນຶ່ງ ໃນເຂດບໍ່ຄຳວັງຕັດ ແລະເຂດຫນອງໄກ່ໂອກ, ໃນປັດຈຸບັນ ໄມ້ດັ່ງກ່າວ ກໍໄດ້ຍຶດໄວ້ ເປັນຫລັກຖານ.

ທ່ານວ່າ ຫລັງຈາກແຂວງອັດຕະປື ໄດ້ປ່ຽນເຈົ້າແຂວງຄົນໃຫມ່ ທ່ານກໍໄດ້ເອົາໃຈໃສ່ ໃນການກວດກາໄມ້ທ່ອນ ທີ່ຜິດກົດຫມາຍຫຼາຍຂຶ້ນ ດ້ວຍການຢືນຢັນວ່າ ຈະລົງໂທ ດພະນັກງານຣັດ ທຸກຄົນທີ່ສົມຮູ້ຮ່ວມຄິດ ໃນການຄ້າໄມ້ທ່ອນ ແລະໃນເວລານີ້ ຫນ່ວຍງານທີ່ກ່ຽວຂ້ອງ ກໍຍັງສືບສວນ ພະນັກງານຣັຖ ຜູ້ທີ່ມີສ່ວນພົວພັນ ກັບການຍຶດ ຣົດ ໄມ້ທ່ອນ ຈຳນວນ 27 ຄັນ ຢູ່ດ່ານພູເກືອ.

http://www.rfa.org/lao/daily/economy/attapeu-discovers-illegal-logs-buried-near-laos-vietnam-border-12182017054925.html

ອອກຄຳເຫັນຜ່ານເຟຊບຸກ