ເລີ້ມສ້າງຫົນທາງຕັ້ງແຕ່ 2013 ຈົນປະຈຸບັນນີ້ກໍ່ຍັງບໍ່ແລ້ວ

ສັ້ນທາງແຕ່ສາມແຍກບ້ານໂພນຫມີ ເມືອງໂພນໂຮງ ໄປຫາບ້ານທ່າລາດ ເມືອງແກ້ວອຸດົມ ແຂວງວຽງຈັນ ທີ່ເຣີ້ມກໍ່ສ້າງມາແຕ່ປີ 2013 ຈົນຮອດປັຈຈຸບັນນີ້ ຍັງສ້າງບໍ່ສໍາເຣັດຈັກເທື່ອ ປັຈຈຸບັນທາງເສັ້ນນີ້ ເຕັມໄປດ້ວຍຂຸມ, ຂີ້ຝຸ່ນ, ແລະຂີ້ຕົມໃນຍາມຝົນ ເຮັດໃຫ້ການສັນຈອນ ໄປມາ ແສນຍາກລໍາບາກ, ດັ່ງຜູ້ປະກອບການຮ້ານຄ້າ ບ້ານທ່າລາດ ເມືອງແກ້ວອຸດົມ ແຂວງວຽງຈັນ ທ່ານນຶ່ງ ເວົ້າວ່າ:

“ບໍ່ໄດ້ສ້ອມແປງ ເພາະວ່າໂຕນີ້ມັນດົນແລ້ວ ບໍ່ແມ່ນ 4-5 ປີແລ້ວບໍ ເຂົາເຈົ້າກໍຍັງບໍ່ໄດ້ສ້ອມແປງ ເຂົາເຈົ້າເຂົ້າມາເຮັດ ແຕ່ຕອນທໍາອິດເລີຍ ທີ່ວ່າທ່ອງທ່ຽວຊ່ວງນັ້ນ ແລ້ວກໍແລ້ວໄປເລີຍ ມີຕະເກຣດແລ້ວປະເລີຍ ແມ່ນລະມັນລໍາບາກ ເພາະຖ້າສົມມຸດວ່າ ເຮືອນຜູ້ໃດ ຈະບໍ່ໃສ່ແກ້ວ ບໍ່ຕິດແອ ຫັ້ນນະ ຈະຢູ່ເຮືອນບໍ່ໄດ້ ເພາະວ່າມັນມີຂິ້ຝຸ່ນ ເຂົ້າໄປຕິດຂອງຢູ່ຂອງກິນ ນັ່ງແຄມທາງບໍ່ໄດ້ເລີຍ.”

ທ່ານກ່າວຕຶ່ມວ່າ ທາງການມີແຜນຈະສ້າງທາງເສັ້ນນີ້ ເປັນທາງປູຊີເມນຢ່າງດີ ໂດຍເຣີ້ມສ້າງມາແຕ່ປີ 2013 ໄດ້ທຸບແລະດຸດ ທາງເກົ່າທີ່ ປູຢາງແຕ່ເປ່ເພແລ້ວນັ້ນຖິ້ມ ແລ້ວວາງທໍ່ຣະບາຍນໍ້າ ຕາມຂ້າງທາງ ແຕ່ບໍ່ປູຊີເມນຈັກເທື່ອ ປ່ອຍໃຫ້ ທາງມີຂຸມ ແລະຂີ້ຝຸ່ນຍາມຣະດູແລ້ງ ແລະ ຂິ້ຕົມໃນຣະດູຝົນ. ຕາມແຜນນັ້ນທາງເສັ້ນນີ້ ມີຄວາມຍາວ 6 ກິໂລແມັດ ຈະສ້າງສໍາເຣັດພາຍໃນ 3 ປີ ຫລືພາຍໃນຕົ້ນປີ 2016.

ກ່ຽວກັັັັັັັບເຣື້ອງນີ້ເຈົ້າໜ້າທີ່ເມືອງໂພນໂຮງ ທ່ານນຶ່ງກ່າວວ່າ ເສັ້ນທາງຈາກ 3 ແຍກເມືອງໂພນໂຮງ ໄປຫາສາມແຍກ ບ້ານໂພນໝີ ທີ່ມີ ຣະຍະທາງປະມານ 9 ກິໂລແມັດນັ້ນ ປູຊິເມນຮຽບຮ້ອຍແລ້ວ ແຕ່ທ່ານຍອມຮັບວ່າ ທາງສາມແຍກບ້ານໂພນຫມີ ໄປຫາ ບ້ານທ່າລາດ ນັ້ນຍັງບໍ່ທັນແລ້ວ ແລະຍັງເປັນດິນແດງຢູ່:

“ສາມແຍກບ້ານໂພນຫມີຫັ້ນແຫລະ ທາງເຂົ້າໄປ ບ້ານທ່າລາດ ມັນເປັນທາງແດງ ເຂົາເຈົ້າກໍາລັງຊິເຮັດໃໝ່ ມັນມີສາມແຍກໂພນໂຮງເນາະ ເຂົ້າໄປແລ້ວທາງດີດອກ ແຕ່ວ່າມັນໄປຮອດສາມແຍກໂພນຫມີ ລະໄປຮອດທ່າລາດ ທາງຢາກເປື້ອນໜ້ອຍຫນຶ່ງ ໄປໄດ້ຢູ່ເພາະວ່າ ອັນນັ້ນ ຝົນບໍ່ຕົກ ແລ້ວທາງແຫ້ງ ມັນກໍໄປໄດ້.”

ເຖິງຢ່າງໃດກໍຕາມທາງການເມືອງແກ້ວອຸດົມ ຊຶ່ງເປັນຜູ້ຮັບຜິດຊອບ ສ້າງເສັ້ນທາງບ້ານໂພນຫມີ ໄປຫາບ້ານທ່າລາດ ນັ້ນເວົ້າວ່າທາງການ ກໍມີແຜນຈະສ້າງເສັ້ນທາງດັ່ງກ່າວ ໃຫ້ແລ້ວເມື່ອມີງົບປະມານ.

http://www.rfa.org/lao/daily/environment/laos-vientiane-phonmy-thalat-road-repairs-unfinished-01022018094730.html

ອອກຄຳເຫັນຜ່ານເຟຊບຸກ