ຊາວສວນ ບໍ່ໄດ້ຮັບ ເງິນຄ່າມັນຕົ້ນເທືຶ່ອ

ຜ່ານມາແລ້ວ ເກືອບ 3 ປີ ຊາວກະສິກອນປູກມັນຕົ້ນ ຫຼາຍຮ້ອຍຄອບຄົວ ຢູ່ເມືອງ ປາກງື່ມ ນະຄອນຫລວງ ວຽງຈັນ ຍັງຄອງຖ້າເງິນ ຂາຍມັນຕົ້ນ ນໍາບໍຣິສັດ ລາວ-ອິນໂດໄຊນາ ໂດຍມີທ່ານ ແສງມາລີ ແສງວັດທະນາ ເປັນປະທານບໍຣິສັດ ທີ່ມີໜີ້ສິນ ຈະຕ້ອງໄດ້ຈ່າຍ ໃຫ້ຊາວກະສິກອນ 100 ປາຍຕື້ກີບ, ດັ່ງຊາວກະສິກອນ ເມືອງປາກງື່ມ ທ່ານນຶ່ງ ກ່າວຕໍ່ ວິທຍຸ ເອເຊັຽ ເສຣີ ໃນມື້ວັນທີ 19 ມີນານີ້ວ່າ:

“ຍັງໆ ຍັງບໍ່ໄດ້ຄືນ ຍັງບໍ່ທັນໄດ້ ໂອ໊ຍ… ມັນກໍຍາດກັນ ມາຫລາຍ ມີແຕ່ປີນີ້ ເພິ່ນວ່າສິຈ່າຍ ພ້ອມເປີດໂຮງງານ ດຽວນີ້ ເພິ່ນເປີດແລ້ວ ໂຮງງານເນາະ ຍັງຕິດໜີ້ ຢູ່ຄືເກົ່າ ຫັ້ນແຫລະ ຍັງໆ ບໍ່ໄດ້ຈັກຄົນວ່າຢູ່… ວ່າຕອນເບື້ອງສິມາເປີດທໍາອິດ ສິໃຊ້ໜີ້ປະຊາຊົນ ໝົດກ່ອນ ເປີດແລ້ວ ລະເສີຍຢູ່ ບໍ່ມີເງິນເງິນເຮົາ ບໍ່ມີເງິນ ພັດຮັບຄົນງານເຂົ້າໄປເຮັດ ເປັນ 100 ຄົນແລ້ວດຽວນີ້ຫັ້ນ.”

ພາຍຫຼັງ ທີ່ບໍຣິສັດດັ່ງກ່າວ ມີບັນຫາດ້ານການເງິນ ແລະ ບໍ່ສາມາດ ຈ່າຍ ຄ່າມັນຕົ້ນ ໃຫ້ກັບຊາວກະສິກອນໄດ້ ເຮັດໃຫ້ຣັຖບານລາວ ແຕ່ງຕັ້ງ ເຈົ້າໜ້າທີ່ ສະເພາະກິດ ແກ້ໄຂບັນຫາໃນປີ 2016-2017 ແລະ ມີມະຕິ ໃຫ້ບໍຣິສັດ ລາວ-ອິນໂດໄຊນາ ສາມາດເປີດໂຮງງານ ມັນຕົ້ນໄດ້ ຕາມຄໍາສເນີ ແລະ ໃຫ້ຈ່າຍເງິນໃຫ້ ຊາວກະສິກອນ ທຸກຄົນ.

ຊາວກະສິກອນ ທ່ານນີ້ ເວົ້າຕື່ມວ່າ ບໍຣິສັດ ລາວ-ອິນໂດໄຊນາ ໄດ້ເປີດໂຮງງານ ມາຕັ້ງແຕ່ຕົ້ນປີ 2018 ພ້ອມກັບ ຈ້າງຄົນງານລາວ ເຂົ້າ ເຮັດວຽກ 100 ປາຍຄົນ. ແຕ່ມາຮອດປັດຈຸບັນ ຊາວກະສິກອນ ກໍຍັງບໍ່ໄດ້ເງິນ ຈັກກີບ ຂະນະທີ່ ເຈົ້າໜ້າທີ່ ຝ່າຍກົດໝາຍ ທະນາຄານ ແຫ່ງຊາດ ສປປ ລາວ ກ່າວໃນມື້ວັນທີ 19 ມີນານີ້ວ່າ ໄດ້ແຈ້ງການ ຜ່ານໜັງສືພິມ ໄປແລ້ວ ເມື່ອປີ 2017 ໃຫ້ຊາວກະສິກອນ ຜູ້ເສັຽຫາຍ ນໍາໃບຮັບເງິນ ມາແຈ້ງ ຕໍ່ເຈົ້າໜ້າທີ່ ຄະນະສານ ການຄ້າ ທີ່ສານປະຊາຊົນສູງສຸດ ເພື່ອພິຈາຣະນາຄະດີ:

“ປະກາດທາງໜັງສືພິມ ເນາະວ່າ ໃຫ້ທາງພາກສ່ວນທີ່ຄົງຄ້າງໜີ້ ໃຫ້ໄປພົວພັນ ຢູ່ສານຕື່ມ ໄປຍື່ນເຣື່ອງຢູ່ສານວ່າໃຜ.. ອິນໂດໄຊນາ ເປັນໜີ້ ທໍ່ໃດ ແມ່ນຫຍັງໆຫັ້ນນະ ໄປຍື່ນໄວ້ຢູ່ສານກ່ຽວກັບ ຄະນະເສຖກິດ ເພິ່ນສິມີການຕັດສິນຂອງ ອິນໂດໄຊນ່າຫັ້ນນະ.”

ທ່ານກ່າວຕື່ມວ່າ ຂະນະນີ້ ກໍຍັງບໍ່ທັນຮູ້ເວລາໃນການ ພິຈາຣະນາຄະດີ ນັ້ນເທື່ອ. ບໍຣິສັດ ລາວ-ອິນໂດໄຊນາ ໄດ້ເຮັດສັນຍາຊື້-ຂາຍມັນຕົ້ນ ກັບຊາວກະສິກອນ ເມືອງປາກງື່ມ ມາແຕ່ປີ 2008 ໂດຍມີເປົ້າໝາຍ ຊ່ອຍຫຼຸດຜ່ອນ ຄວາມທຸກຍາກຂອງປະຊາຊົນ. ແຕ່ບໍຣິສັດ ເກີດບັນ ຫາດ້ານການເງິນ ແລະ ບໍ່ມີເງິນຈ່າຍ ຄ່າມັນຕົ້ນ ໃຫ້ຊາວກະສິກອນ.

https://www.rfa.org/lao/daily/economy/farmers-in-paknguem-district-awaiting-for-payment-from-lao-Indochina-company-03192018103730.html

ອອກຄຳເຫັນຜ່ານເຟຊບຸກ