ເຄື່ອງສົງເຄາະຄ້າງສາງ ຍັງຂາດ ຜູ້ຈັດແຍກ

ເຄື່ອງສົງເຄາະ ຊ່ວຍເຫລືອຜູ້ປະສົບພັຍນໍ້າຖ້ວມ ທີ່ໄດ້ຈາກການບໍຣິຈາກ ທັງໃນແລະຕ່າງປະເທດ ເພື່ອເອົາໄປມອບໃຫ້ປະຊາຊົນ ເມືອງສນາມໄຊ ແຂວງອັດຕະປື ທີ່ໄດ້ຮັບຜົລກະທົບ ຢ່າງໜັກໜ່ວງນັ້ນ ຍັງຄ້າງສາງຢູ່ຫຼວງຫລາຍ ໂດຍສະເພາະສາງ ຢູ່ນະຄອນຫຼວງ ວຽງຈັນ ອັດຕະປື ແລະຈໍາປາສັກ ຍ້ອນບໍ່ມີແຮງງານ ມາຊ່ວຍແຍກເຄື່ອງ ຫາກມີແຕ່ພະນັກງານ ກະຊວງແຮງງານ ແລະສວັດດີການສັງຄົມ ເທົ່ານັ້ນທີ່ມາຊ່ວຍເຮັດໃຫ້ ການສົ່ງເຄື່ອງຊ່ວຍເຫລືອ ນັ້ນຫລ່າຊ້າ, ຕາມຄໍາເວົ້າຂອງເຈົ້າໜ້າທີ່ ກະຊວງແຮງງານ ແລະສວັດດີການສັງຄົມ ກ່າວຕໍ່ RFA ໃນມື້ວັນທີ 7 ສິງຫາ ນີ້:

“ໂອ໊ ກໍຢາກໄດ້ຫລາຍ ແຕ່ເຮົາກໍຢາກໄດ້ແຫລະ ເພາະວ່າມັນບໍ່ມີແທ້ໆ ຢາກໃຫ້ໃຈ້ອອກ ມັນຍາກບ່ອນນີ້ແຫລະ ອັນນັ້ນ ດຽວນີ້ມັນອັ່ງ ສະໂມສອນເພິ່ນສິມີປະຊຸມ ແມ່ນຫຍັງດ່ວນຫັ້ນນະ.”

ທ່ານກ່າວຕື່ມວ່າ ເຄື່ອງບໍຣິຈາກ ທີ່ປະຊາຊົນນໍາມາບໍຣິຈາກ ໃຫ້ຜູ້ປະສົບພັຍນໍ້າຖ້ວມ ຢູ່ເມືອງສນາມໄຊ ສ່ວນຫລາຍຈະເປັນເຄື່ອງນຸ່ງ ປະເພດເສື້ອ, ສົ້ງ, ເຄື່ອງອຸປໂພກ ບໍຣິໂພກ ແລະອີກຈໍານວນນຶ່ງ ກໍເປັນເຕັ້ນບັງແດດ ຊຶ່ງມີຈໍານວນຫຼວງຫຼາຍ ແລະຕ້ອງແຍກເຄື່ອງນັ້ນ ໃຫ້ໄວທີ່ສຸດ ເພື່ອສົ່ງໄປໃຫ້ຜູ້ປະສົບພັຍ ທີ່ເມືອງສນາມໄຊ.

ທາງການລາວ ນໍາເຄື່ອງຂອງຈໍານວນຫລາຍ ທີ່ໄດ້ຮັບບໍຣິຈາກ ມາແຕ່ວັນທີ 26 ກໍຣະກະດາ ຈົນມາຮອດປັດຈຸບັນ ໄປເກັບມ້ຽນໄວ້ສາງ ຫລັກ 17 ໃນສະໂມສອນ ເມືອງໄຊທານີ ນະຄອນຫລວງວຽງຈັນ ຊຶ່ງໃນແຕ່ລະມື້ ມີເຄື່ອງບໍຣິຈາກ ປະມານ 4 ຫາ 6 ຕູ້ຄັນເທນເນີ ເຮັດໃຫ້ສາງສະໂມສອນເມືອງ ເຕັມໄປດ້ວຍເຄື່ອງບໍຣິຈາກ ບໍ່ມີຮອດບ່ອນປະຊຸມ ແລະບ່ອນຈອດຣົດ.

ເຄື່ອງບໍຣິຈາກ ທີ່ຈະຊ່ວຍຜູ້ປະສົບພັຍນໍ້າຖ້ວມ ຊຶ່ງແຂວງຕ່າງໆ ເປີດຮັບນັ້ນ ປັດຈຸບັນກໍຍັງຄ້າງສາງ ເປັນຈໍານວນຫລາຍ. ຕ້ອງການ ອາສາສມັກ ປະມານ 300 ຄົນ ຄັດແຍກເຄື່ອງບໍຣິຈາກ ຢູ່ສາງໃຫຍ່ໆ ໂດຍສະເພາະຢູ່ແຂວງ ອັດຕະປື ຈໍາປາສັກ ແລະ ນະຄອນຫຼວງ ວຽງຈັນ.

ເຈົ້າໜ້າທີ່ກະຊວງແຮງງານ ແລະສວັດດີການສັງຄົມ ກ່າວຕື່ມວ່າຫາກຍັງຂາດແຮງງານ ມາແຍກເຄື່ອງບໍຣິຈາກນັ້ນ ກໍອາຈເຮັດໃຫ້ ເຄື່ອງຂອງ ມີກິ່ນເໝັນ ເພາະສ່ວນຫລາຍກໍເປັນເຄື່ອງນຸ່ງເກົ່າ ທີ່ເຄີຍໃຊ້ມາແລ້ວ ແລະກໍຍັງກັງວົນນໍາ ເຣື່ອງອາຫານ ບູດເນົ່າ ແລະ ໃກ້ຈະໝົດອາຍຸ ກໍມີຫລາຍ.

 

https://www.rfa.org/lao/daily/politics/attapeu-lacks-volunteers-organize-donations-supplies-08072018115022.html

ອອກຄຳເຫັນຜ່ານເຟຊບຸກ