ຊາວບ້ານນາເຕີຍ ກັງວົນ ການເສັຽດິນ ໃຫ້​ແກ່​ໂຄງ​ການ​

ປະຊາຊົນຫຼາຍຄົນ ຢູ່ເມືອງຫລວງນໍ້າທາ ແຂວງຫລວງນໍ້າທາ ມີຄວາມກັງວົນ ຢ້ານຈະເສັຽ ທີ່ດິນທຳການຜລິດ ໃຫ້ແກ່ ໂຄງການພັທນາ ຕົວເມືອງໃໝ່ ຂອງບໍຣິສັດ ອັມມະຕະ ທີ່ຈະເຂົ້າມາລົງທືນ ສ້າງເມືອງຫລວງນໍ້າທາ ເປັນເມືອງ ທີ່ທັນສ​ມັຍ ຄົບວົງຈອນ ຢູ່ 2 ຈຸດ ຄື: ເຂດເທສບານ ເມືອງຫລວງນໍ້າທາ ແລະ ເຂດບ້ານນາເຕີຍ ຊຶ່ງການຈະສ້າງ ເມືອງຫລວງນໍ້າທາ.

ໂຄງການດັ່ງກ່າວ ກວມເອົາດິນທຳການຜລິດ ຂອງປະຊາຊົນ ເກືອບທຸກບ້ານ ຂອງເມືອງຫລວງນໍ້າທາ ເປັນຕົ້ນ ດິນນາ, ດິນສວນ ເຮັດໃຫ້ ປະຊາຊົນ ກັງວົນ ເພາະຢ້ານ ຈະເສັຽທີ່ດິນ ທຳການຜລິດ ຂອງພວກຂະເຈົ້າ ດັ່ງປະຊາຊົນທ່ານນຶ່ງ ກ່າວຕໍ່ ວິທຍຸ ເອເຊັຽ ເສຣີ ໃນວັນທີ 2 ຕຸລາ ນີ້ວ່າ:

“ຖ້າເຂົາຈະມາ ຕັ້ງໂຮງຈັກ ໂຮງງານຕ່າງໆນັ້ນ ດິນເຮົານີ້ ຢ້ານບໍ່ມີ ທີ່ເຮັດກິນ ຄືທີ່ຜ່ານມາຫັ້ນ ເພາະວ່າ ດິນດອນຕອນຫຍ້າ ເຂົາຊີເອົາ ໄປຫມົດ ທົ່ງໄຮ່ທົ່ງນາຫັ້ນ ບາດນີ້ ເຮົາຊີໄປຢູ່ສ້າງສາ ຢູ່ບ່ອນໃດ ເພາະບໍ່ມີດິນ ມີດອນ ຈະເຮັດເນາະ ຂະເຈົ້າ ເອົາໄປຫມົດ ບາດນີ້ຄ່າ ຊົດເຊີີຍ ທີ່ຈະໃຫ້ນັ້ນ ຈະໃຫ້ຫລາຍປານໃດ ຍັງບໍ່ຮູ້ເທື່ອ ຖ້າຈະໄປສ້າງບ່ອນໃໝ່ນັ້ນ ມັນຊີບໍ່ຄືເກົ່າ ເພາະບ່ອນເກົ່າ ເຮົາເຮັດມາແຕ່ດົນ ເຮົາຈະບໍ່ມີ ບ່ອນທຳມາຫາກິນເນາະ.”

ປັຈຈຸບັນ ກຸ່ມບໍຣິສັດ ອັມມະຕະ ແມ່ນບໍຣິສັດຂອງໄທ ກຳລັງດຳເນີນ ການສຳຣວດ ເກັບຂໍ້ມູນຕ່າງໆ ເປັນຕົ້ນ ສຳຣວດພື້ນທີ່ ທີ່ຈະກໍ່ສ້າງ ເຊັ່ນ: ຊົນລະປະທານ, ເສັ້ນທາງ, ໂຮງຮຽນ, ໂຮງໝໍ ແລະ ອື່ນໆ ຮວມໄປເຖິງ ຄ່າຊົດເຊີຍ ໃຫ້ປະຊາຊົນ ດັ່ງເຈົ້າໜ້າທີ່ ເມືອງຫລວງນໍ້າທາ ທ່ານນຶ່ງ ກ່າວຕໍ່ ວິທຍຸ ເອເຊັຽ ເສຣີ ວ່າ:

“ປັດຈຸບັນ ແມ່ນຢູ່ໃນຊ່ວງການດຳເນີນການສໍາຣວດ ແລະ ເກັບຂໍ້ມູນ ຄາດວ່າ ກາງປີ 2019 ແມ່ນໃຫ້ສຳເລັດ.”

ແຕ່ເຖິງຢ່າງໃດກໍຕາມ, ປະຊາຊົນ ສ່ວນໃຫຍ່ ແມ່ນບໍ່ພໍໃຈ ກ່ຽວກັບ ໂຄງການດັ່ງກ່າວນີ້ ຍ້ອນວ່າ ເມື່ອບໍຣິສັດ ເຂົ້າມາ ພັທນາແລ້ວ ປະຊາຊົນ ຈະບໍ່ມີດິນ ທຳການຜລິດ ເປັນຕົ້ນ ການເຮັດນາ ເຮັດສວນ ເນື່ອງຈາກວ່າ ອາຊີບ ຂອງປະຊາຊົນ ໃນເມືອງຫລວງນໍ້າທາ ສ່ວນຫລາຍ ແມ່ນເຮັດນາ ແລະ ເຮັດສວນ. ໂຄງການດັ່ງກ່າວ ຄາດວ່າ ຈະເລີ່ມລົງມື ກໍ່ສ້າງໃນທ້າຍປີ 2019.

 

https://www.rfa.org/lao/daily/economy/laos-residents-in-LNT-worry-that-they-would-loose-land-10032018104428.html

ອອກຄຳເຫັນຜ່ານເຟຊບຸກ